Madaxweyne Sheekh Shariif:- Ciidamada Itoobiya ee ka baxay deegaano ka tirsan gobolada dalka waxaan aaminsanahay inay kaliftay

Madaxweynaha dowladda KMG Soomaaliya Shariif Sheekh Axmed ayaa ka hadlay ka bixitaankii ciidamada Itoobiya ee deegaano ka tirsan gobolada Hiiraan iyo Galgaduud oo ay la wareegeen Xarakada Al-shabaab, wuxuuna sheegay inaanu jecleyn inay arrintaasi dhacdo oo deeganadaasi ay ka baxaan ciidamada Itoobiya iyo kuwa Ahluu Sunna.
Sheekh Shariif oo weli ku sugan degmada Afgooye ee gobolka Sh/hoose ayaa mar la weydiiyey su’aal aheyd sida uu u arko in degmooyin ay horay ugu sugnaayeen ciidamada Itoobiya iyo kuwa Ahlu Sunna oo dagaal kula jiray Al-shabaab ayaa waxa uu yiri “Runtii anigu ma jecleyn inay arrintaasi dhacdo haddana waa dhacday, uma aragno wax dhib ah, laakiin marwalba in awood Shabaab ay yeehseen inay meesha ku qabsadeen, laakiin waxaan aaminsanahay in waxyaabo kale oo kalifay inay jiraan”.
Sidoo kale Madaxweyne Shariif waxa uu ka hadlay sida uu u arko hadalkii ka soo yeeray dowladda Mareykanka ee ahaa in xayiraad dhinac walba ah la saari doono cid kasta oo ka hortimaada qorshaha Road Map-ka ayaa waxa uu yiri “Aad ayaan u taageersanahay hadalkaasi, waana soo dhaweynaynaa, waayo wuxuu dhiiragelinayaa qorshaha Road Map-ka inaysan cidina ka horimaan” ayuu yiri Shariif oo dhinaca kale ku dooday in laga adkaaday sida uu yiri Xarakada Al-shabaab ciidan ahaan iyo istaraatiijad ahaan.
Ciidamada Itoobiya ayaa ka baxay degmada Ceelbuur oo labo bilood ka hor ay la wareegeen iyo deegaano kale, iyadoo Al-shabaab ay dib u qabsadeen, dad badan ayaana aaminsan in tallaabada ciidamada Itoobiya uga baxeen Ceelbuur, Wabxo iyo degmada Maxaas inay salka ku heysto khilaaf soo kala dhexgalay Ahlu Sunna iyo ciidamad Itoobiya

garable.com
muxudin diini fiidow