Shariif Xassan : Anniga QASWADE Ma’ahi Laakiin Waxaan Ka Shaqeynayaa Sidii Xasilooni Loo Heli Lahaa

Iyadoo aad moodo in dhinacyada shirku ugu soo dhamaaday magaalada Addis Ababa aqoonsaneyn baarlamaan Soomaaliyeed oo hadda jira, islamarkaana odayaasha dhaqan-ku sii shaqeyn doonaan ilaa laga soo xulayo baarlamaan cusub, ayaa waxaa arintaa ka hadllay Shariif Xassan Shiikh Aadan.
Wariyaha BBC-da ee magaalada Addis Ababa oo la kulantay shariif Xassan ayaa weydiisay waxa ay shaqadiisu noqoneyso maadaama uusan jirin baarlamaan uu hadda guddoomiye u yahay.
‘’Anniga shaqeydeydu waxaa ay tahay oo aan u xil saarnahay in aan dalka ka saaro ku-meel-gaarnimada, howshaa ayaa leygu og-yahay wixii hadda ka danbeeya ayuu yiri,’’ Shariif Xassan Shiikh Aadan.
Waxaa uu sheegay sababta keentay in baarlamaanka laga talaabsado tahay khilaafka xoogan ee soo kala dhaxgalay baarlamaanka Soomaaliya, sidaa daraadeed waxaa uu sheegay in haddii uusan hadda baarlamaan jirin, isaga mas’uuliyad kale saaran tahay oo  ah in uu dhameeyo qorshaha tubta nabada inta ka harsan dowladda.
Wariyaha BBC-da ayaa weydiisay Shariif Xassan Su’aal shaqsi ah oo aheyd bal in uu isku arko isaga laftirkiisa QASWADE maadaama marar badan uu soo noq noqday magaciisa.
‘’Anniga Qaswade ma’ah, waxaan ka shaqeynayaa sidii ay dadka Soomaaliyeed xasilooni u heli lahaayeen ayuu ku gaabsaday Shariif Xassan Shiikh Aadan.
Shariif Xassan ayaa inta badan lagu xantaa in uu yahay shaqsi turubka siyaasada sidii uu doono u dheelo, oo haddii uu markaa danihiisa ka dhax waayo bilaaba fowdo iyo khas siyaasadeed sidii marar badan oo horeba dhacday.

garable.com
muxudin diini fiidow

Booliska Dalka Holland oo gacanta mariyay teendhooyin ay ku jireen Qoxoonti Soomaliyeed

Booliiska dalka Holland ayaa waxaa la sheegay inay burburiyeen oo ay cagta mariyeen teendhooyin ay ku jireen qaxooti Soomaali iyo Iiraan ah oo banaanbax ama cabasho ka sameynaayey ka dib markii loo sheegay inay dib ugu noqdaan dalkooda, maadaama aanan wax sharci ah laga siineyn dalka Holland oo kiiskoodu uu xirmay.

Sida warku sheegayo ciidamada booliska ayaa buburiyey teendhooyinkii ay dadkaasi ku jireen ka dib mark ay diideen inay ka tagaan goobta ay cabashada ka dhigayeen, waxaana la xiray dad ka badan 117-qof oo isugu jira Soomaali iyo Iiraaniyiin.

Wasiirka qaxootiga ee dalka Holland Gerd Leers ayaa sheegay inaysan qaxootigaas wax xaq ah u lahayn in la dejiyo ama la siiyo sharci dalka Holland ah maadaama uu kiiskoodu soo xirmay, wuxuuna intaasi ku daray inay tixgelin siinayaan cabashada qaxootiga reer Ciraaq oo aqbalay inay goobta ka tagaaa intii aan la weerarin ka hor.

Dowladda Holland ayaa horay u sheegtay in qaxootiga Soomaalida ah ay dalkooda dib ugu celinayso, gaar ahaan kuwa aan heysan sharciga dal ku jooga ah, iyadoo wixii markaasi ka dambeeyay ay soo baxeen warar sheegaya inuu heshiis qarsoodi ah uu dhexmaray dowladda KMG iyo dowladda Holland kaas oo ku saabsan in dib loo soo celiyo qaxootiga Soomaalida ah, inkastoo markii dambe ay dowladda KMG iyo dowladda Holland-ba ay warkaasi beeniyeen, sheegeenna inaan dib loo soo celin doonin qaxootiga Soomaalida ah ee ku nool dalka Holland

garable.com

muxudin diini fiidow

Nin cadaan ah oo xalay lagu dilay gudaha suuqa weyn ee Bakaara iyo warrar kala duwan oo ka soo baxaya

Wararka naga soo gaaraya magaalada Muqdisho ayaa waxay sheegayaan in xalay gudaha suuqa weyn ee Bakaaraha lagu toogtay nin cadaan ah oo la sheegay inuu u dhashay dalka Turkiga, kaas oo lagala soo baxay Hotel lagu magacaabo Fardow oo uu deganaa.

Sida warku sheegayo dilka Ninka cadaanka ah ee u dhashay dalka Turkiga ayaa waxaa dilkiisa fuliyey kooxo dhalinyaro ah oo bastoolado ku hubeysnaa, kuwaas oo markii ay dileen ka dibna ka qaatay lacag doolar ah oo aad u farabadneyd, inkastoo aan la sheegin cadada lacagtaasi inta ay la’egtahay.
Warar kale ayaa waxay sheegayaa in ninka aan Hotelka lagala soo bixin balse uu fadhiyey jardiin hotelka hoostiisa ku yaalay, halka wararka kalena ay sheegayaan in ninka uu ku sii socday Masaajid ku yaala Hotelka ka soo horjeedkiisa, lamana oga sababta rasmiga ah ee ka dambeysa dilka ninkan u dhashay dalka Turkiga iyo cidda dishay toona, mana jirto illaa iyo hadda cid ka hadashay dilkiisa.
Waa markii ugu horeysay oo nin ajnabi ah si bareer ah loogu toogto gudaha suuqaweyn ee Bakaaraha, waxaana jiray dilal loo geysaney dad Soomaali ah oo u shaqeynayey dowladda KMG iyo dad kale oo rayid ahaa, kuwaas oo siyaabo kala duwan loo fuliyey dilalkooda, iyadoo qaarkoodna ay sheegteen inay ka dambeeyeen Xarakada Al-shabaab
garable.com
muxudin diini fiidow