WASAARADDA MAALIYADA OO KA SOO HORJEESATAY GUDDIGA LOO SAARAY DHAQAALAHA SOMALIA

Iyadoo shirarkii is xig xigay ee ka kala dhacay Magaalooyinka Lodon iyo Istambuul laga soo saaray qodobo ay ka mid ahaayeen in guddi isku dhaf ah oo isugu jira ajaanib iyo Soomaali loo saaro maamulka dhaqaalaha soo gala Soomaaliya hana noqoto kan gudaha laga soo saaro ama kan dibadda ka yimaada ee loogu yabooho dalka Soomaaliya ayaa arrintaasi waxaa si cad uga soo horjeestay wasaaradda maaliyadda Xukummadda KMG ee Soomaaliya.

Wasiiru dowlaha wasaaradda Maaliyadda ahna ku simaha wasiirka wasaaradaasi Sheekh Aadan Xaaji Madeer oo la hadlay wabarimedia.com ee Magaalada Muqdisho ayaa waxa uu sheegay in gumeysi Dad badan ay tahay arrintaasi, islamarkaana aysan u cuntamayn ummadda Soomaaliyeed in dad Ajaanib ah ay maamulaan dhaqaalohooda.

Wuxuu sheegay Sheekh Aadan Xaaji Madeer in arrintaasi ay keenayso aamin darro islamarkaana uu shaqsi ahaan uga soo horjeedo ayana tahay sida uu sheegay meel ka dhac weyn.

Wasiiru dowlaha wasaaradda Maaliyadda Sheekh Aadan Xaaji Madeer wuxuu sidoo kale hoosta ka xariiqay in arrintaasi ay meel uga dhacayso Madaxmaanida Soomaaliya, islamarkaana aysan ahayn in la aqbalo.

Dhawaan ayay ahayd markii Bangiga adduunka uu sheegay in lacago aad u fara badan oo loogu deeqay Dalka Soomaaliya aan loo maamulin sidii loogu talagalay islamarkaana la lunsaday, dad baddana waxa ay saluugsan yihiin qaabka loo maareeyo dhaqaalaha soo gala dalkeena Soomaaliya

garable.com
muxudin diini fiidow